Aşgabat, 4-nji awgust (TDH). Şu gün paýtagtymyzdaky «Arkadag» myhmanhanasynda hormatly Prezidentimiz Serdar Berdimuhamedow Türkmenistanyň, Täjigistanyň hem-de Özbegistanyň döwlet Baştutanlarynyň üçtaraplaýyn sammitine gatnaşmak üçin Aşgabada gelen Täjigistan Respublikasynyň Prezidenti Emomali Rahmon bilen duşuşdy.

Iki döwletiň Baştutanlary mähirli salamlaşyp, myhmanhananyň eýwanynda üçtaraplaýyn duşuşyga gatnaşyjy ýurtlaryň Döwlet baýdaklarynyň öňünde surata düşdüler we soňra «Bedewler» zalyna geçdiler. Bu ýerde ikitaraplaýyn gepleşikler boldy.

Döwlet Baştutanymyz belent mertebeli myhmany mübärekläp, «Türkmenistan — Täjigistan — Özbegistan» görnüşindäki ilkinji duşuşyga gatnaşmaga çakylygy kabul edendigi üçin minnetdarlyk bildirdi. Bu sammit köpugurly özara bähbitli hyzmatdaşlygyň ileri tutulýan ugurlaryny kesgitlemäge hem-de goňşy ýurtlaryň arasynda ähli ulgamlardaky gatnaşyklary mundan beýläk-de ösdürmek babatda pikir alyşmaga mümkinçilik döreder we däp bolan hyzmatdaşlyga täze itergi berer.

Dostlukly döwletiň Baştutany türkmen topragynda mähirli kabul edilendigi hem-de üçtaraplaýyn sammiti geçirmek başlangyjy üçin tüýs ýürekden hoşallyk bildirip, Täjigistanyň sebit hyzmatdaşlygyny pugtalandyrmakda möhüm orun eýeleýän Bitarap Türkmenistan bilen hemmetaraplaýyn gatnaşyklaryň mundan beýläk-de giňeldilmegine gyzyklanma bildirýändigini nygtady.

Söhbetdeşligiň dowamynda taraplar öňde boljak hem-de gün tertibine özara bähbitli hyzmatdaşlygyň möhüm meseleleri girizilen türkmen-täjik-özbek duşuşygy babatda pikir alyşdylar we tutuş sebitde durnukly ösüşi üpjün etmäge gönükdirilen bilelikdäki täze taslamalary durmuşa geçirmek üçin goňşy ýurtlaryň tagallalaryny birleşdirmegiň zerurdygyny bellediler.

Ikitaraplaýyn we köptaraplaýyn görnüşde, şol sanda abraýly halkara guramalaryň, ilkinji nobatda, BMG-niň çäklerinde üstünlikli ösdürilýän netijeli türkmen-täjik dialogynyň esasy ugurlaryna aýratyn üns berildi. Söhbetdeşler ählumumy ösüşiň möhüm meseleleri boýunça Türkmenistanyň hem-de Täjigistanyň garaýyşlarynyň ýakyn bolmagynyň, halkara giňişlikde birek-birege goldaw bermegiň goňşy döwletleriň netijeli hyzmatdaşlyk etmegine, doganlyk halklary gadymdan bäri baglanyşdyryp gelýän ynanyşmak we hormat goýmak gatnaşyklarynyň pugtalandyrylmagyna ýardam berýändigini kanagatlanma bilen bellediler. Şunuň bilen baglylykda, geçen onýyllyklaryň dowamynda ikitaraplaýyn hyzmatdaşlygyň depginli ösdürilýändigi kanagatlanma bilen nygtaldy. Şu ýyl bolsa Türkmenistan bilen Täjigistanyň arasynda diplomatik gatnaşyklaryň ýola goýulmagynyň 30 ýyllygy bellenilýär.

Hormatly Prezidentimiziň şu ýylyň maý aýynda Täjigistan Respublikasyna amala aşyran döwlet sapary däp bolan hyzmatdaşlyga kuwwatly itergi berip, döwletara gatnaşyklaryň taryhynda täze sahypany açdy. Mälim bolşy ýaly, ýokary derejedäki duşuşygyň netijeleri boýunça resminamalaryň uly toplumyna, şol sanda Türkmenistan bilen Täjigistan Respublikasynyň arasynda strategik hyzmatdaşlygy çuňlaşdyrmak hakynda Jarnama gol çekildi. Jarnamada iki döwletiň köpugurly hyzmatdaşlygy mundan beýläk-de işjeň ösdürmegi maksat edinýändigi berkidildi.

Hormatly Prezidentimiz Serdar Berdimuhamedowyň saparynyň öňüsyrasynda Duşenbe şäherinde möhüm wakalaryň bolup geçendigini bellemek gerek. Şolaryň hatarynda Türkmen-täjik işewürler maslahaty, bilelikdäki Işewürlik geňeşiniň birinji mejlisi, iki ýurduň eksport harytlarynyň sergisi hem-de döwletlerimiziň ylmy intelligensiýasynyň wekilleriniň gatnaşmagynda geçirilen «tegelek stoluň» başyndaky duşuşyk bar.

Şu günki söhbetdeşligiň dowamynda taraplar dürli ulgamlardaky ikitaraplaýyn hyzmatdaşlygyň gazanylan derejesine, parlamentara gatnaşyklaryň işjeňleşdirilmegine, Hökümet we pudak derejelerindäki hyzmatdaşlygyň toplanan oňyn tejribesine ýokary baha berip, bar bolan mümkinçilikleri doly derejede ulanmagyň we hyzmatdaşlygy täze sepgitlere çykarmagyň zerurdygyny bellediler. Şunuň bilen baglylykda, söhbetdeşler ozal gazanylan hem-de syýasy-diplomatik, söwda-ykdysady, medeni-ynsanperwer ulgamlardaky netijeli hyzmatdaşlygy mundan beýläk-de pugtalandyrmaga hem-de diwersifikasiýalaşdyrmaga gönükdirilen ylalaşyklaryň yzygiderli durmuşa geçirilmeginiň möhümdigini nygtadylar. Söwda-ykdysady we ylmy-tehniki hyzmatdaşlyk boýunça hökümetara türkmen-täjik toparynyň işi bu ugurdaky bilelikdäki tagallalaryň netijeli bolmagyna hyzmat etmelidir.

Umumy pikire görä, hut şeýle toplumlaýyn çemeleşme hem-de ruhy, medeni, taryhy gymmatlyklaryny aýawly saklap, nesilden-nesle geçirip gelýän iki halkyň köpasyrlyk dostlugy täze taryhy eýýamda deňhukuklylyk, ynanyşmak we özara bähbitlilik ýörelgeleri esasynda ýola goýulýan uzak möhletleýin hyzmatdaşlygy ösdürmek üçin ygtybarly binýat bolup hyzmat edýär.

Duşuşygyň ahyrynda Prezidentler Serdar Berdimuhamedow hem-de Emomali Rahmon Türkmenistanyň we Täjigistanyň köpugurly döwletara gatnaşyklary mundan beýläk-de çuňlaşdyrmaga taýýardyklaryny ýene bir gezek tassyklap, iki dostlukly ýurduň halklaryna parahatçylyk, durnuklylyk, abadançylyk, rowaçlyk arzuw etdiler.