Çuňňur hormatlanylýan Türkmenistanyň Prezidenti!

Hazar deňziniň güni mynasybetli geçirilen «Hazar deňzi — dostluk we parahatçylyk deňzi» atly ylmy-amaly maslahata gatnaşyjylara iberen mähirli Gutlagyňyz üçin Size tüýs ýürekden sagbolsun aýdýarys. Siziň janyňyzyň sag, ömrüňiziň uzak bolmagyny, il-ýurt bähbitli beýik işleriňiziň elmydama rowaçlyklara beslenmegini arzuw edýäris.

Hormatly Prezidentimiz!

Siziň parasatly baştutanlygyňyzda Hazar deňziniň sebitinde söwda-ykdysady, medeni-durmuş gatnaşyklarynyň ösdürilmegi ugrunda ýurdumyz tarapyndan giň gerimli işler durmuşa geçirilýär we bu ugurda möhüm başlangyçlar öňe sürülýär. Olaryň ählisi Hazar deňzini parahatçylygyň, ynanyşmagyň, ekologik taýdan abadançylygyň mekanyna öwürmäge gönükdirilip, Hazarýaka döwletleriň we abraýly halkara guramalaryň giň goldawyna eýe bolýar. 2002-nji ýylda Aşgabatda birinji Hazar sammitiniň, 2012-nji ýylda «Awaza» milli syýahatçylyk zolagynda birinji Hazar ekologiýa forumynyň we 2019-njy ýylda birinji Hazar ykdysady forumynyň geçirilmegi Hazarýaka döwletleriň arasyndaky hyzmatdaşlygyň işjeňleşdirilmeginde möhüm ädimler hökmünde taryha girdi.

Belent mertebeli Prezidentimiz!

Siziň 2022-nji ýylyň 29-njy iýunynda Aşgabat şäherinde ýokary guramaçylyk derejesinde geçirilen Hazarýaka döwletleriň Baştutanlarynyň VI sammitinde eden taryhy çykyşyňyzda: «Hazar deňziniň daşky gurşawyny goramak biziň umumy möhüm maksadymyz bolup durýar. Bu babatda Türkmenistanyň garaýşy anyk kesgitlenendir hem-de üýtgewsizdir: ähli ykdysady we önümçilik işi deňziň ekologik howpsuzlygyna berk bagly bolmalydyr, tebigaty goramak babatda ykrar edilen dünýä standartlaryna laýyk gelmelidir» diýip bellemegiňiz ýurdumyzda Hazar deňzinde ekologik abadançylygyň üpjün edilmegine aýratyn üns berilýändiginiň aýdyň güwäsi boldy. Altynjy Hazar sammitiniň dowamynda Hazarýaka döwletleriň Baştutanlarynyň Bilelikdäki Beýannamasynyň kabul edilmegi bäştaraplaýyn hyzmatdaşlygyň has-da ösdürilmegine uly itergi berdi.

Türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedowyň başlangyjy bilen düýbi tutulyp, Siziň baştutanlygyňyzda yzygiderli ösdürilýän «Awaza» milli syýahatçylyk zolagy sebitde durnukly ösüşiň aýdyň nusgasy hökmünde tanalýar we möhüm ähmiýetli çäreleriň geçirilýän mekanyna öwrülýär. Gahryman Arkadagymyzyň ýurdumyza baştutanlyk eden ýyllarynda alnyp barlan beýik işleriň netijesinde Türkmenistan tanalmaz derejede özgerdi. Halkymyzyň rysgal-berekediniň, türkmen topragynyň, tebigatynyň sahawaty has-da artdy. Tebigat — bu adamzada berlen bahasyna ýetip bolmajak baýlykdyr. Şonuň üçin asyrlarboýy tebigat bilen sazlaşykly ýaşap gelen halkymyz onuň her bir baýlygyny gözüniň göreji ýaly gorap saklamagy-da başarýar. Ählihalk bag ekmek çäreleri esasynda tutuş ýurdumyz bilen birlikde, Hazaryň türkmen kenary-da bagy-bossanlyga bürenýär.

Arkadagly Gahryman Serdarymyz!

Hazar sebitindäki ekologik meseleleri çözmek bilen bagly wezipeleriň giň toplumy boýunça hyzmatdaşlygy netijeli dowam etdirmäge gönükdirilen «Hazar ekologik başlangyjyny» döretmek baradaky başlangyjyňyzyň Hazarýaka döwletleriň ekologik abadançylygy üpjün etmegi nazarlaýan tagallalaryny birleşdirmekde, geljekde bu ugurda uly üstünlikleri gazanmakda möhüm gural bolup hyzmat etjekdigine berk ynanýarys.

Çuňňur hormatlanylýan Türkmenistanyň Prezidenti!

«Hazar deňzi — dostluk we parahatçylyk deňzi» atly ylmy-amaly maslahata gatnaşyjylara iberen mähirli Gutlagyňyz üçin Size ýene-de bir gezek tüýs ýürekden sagbolsun aýdýarys. Siziň janyňyzyň sag, ömrüňiziň uzak, il-ýurt bähbitli beýik işleriňiziň elmydama rowaç bolmagyny arzuw edýäris.

Sizi çuňňur hormatlamak bilen,

«Hazar deňzi — dostluk we parahatçylyk deňzi» atly ylmy-amaly maslahata gatnaşyjylar.